滾喜火鍋專門店 (已結業)

約左朋友食飯唔知食咩好，所以又去左食雞煲打邊爐。餐廳位於女人街內，外表睇落仲以為係茶餐廳，原來內有乾坤。餐廳主打食麻辣雞煲同芝士雞煲，不過我同朋友都怕芝士雞煲太膩所以揀左麻辣味道既小辣。飲品都係自助形式，除左各式汽水，仲有竹蔗茅根，清熱下火，咁就唔怕打邊爐熱氣啦!呢個係自家制鹹蛋黃炸魚皮，好香脆，而且真係好多鹹蛋黃漿包住，極度邪惡之選!雞煲一黎到已經聞倒好香，店員仲會用計時器計時，確保我地可以食到最嫩滑既雞件。呢度雞煲既味道同其他雞煲店唔同，因為佢加左唔同既香料，好惹味，夠麻又夠辣!值得一讚係雞件好多肉，唔會只係得骨，所以我地兩個女仔食完半隻雞都唔需要再添雞，因為已經開始有啲飽!火鍋配料都有好多選擇，海鮮、肉類、丸類、蔬菜都集齊。我地仲升級要左安格斯牛肉!牛肉油脂分佈平均，食落牛味香濃。海鮮都好新鮮，海蝦夠彈牙，鱔片好脆口。另外唔小得一系列食雞煲必叫既配料，豆腐，響玲，芋頭，樣樣都索哂啲汁好入味!最中意係落單可以按件落單，咁就唔怕叫得太多食唔哂，已經同朋友約埋搵日要再試埋個芝士雞煲!