小糖鈕 (已結業)

終於可以去睇期待已久嘅《與神同行》，但係我男朋友仲未放工，就唯有搵個地方hea，行下行下就見到一間service apartment 入面有間甜品店，所以就打算入去食住下午茶等埋男朋友。估唔到呢度除左有甜品食之外，仲有正餐。所以我就叫左一個海南雞飯同一個甜品等男朋友黎一齊食。海南雞飯通常出去食海南雞飯，都係得脾、背、翼其中一樣，而呢度竟然每個部分都有，等我地唔駛為爭食而大打出手😂 而且海南雞飯質素都唔錯，肉質唔會太“鞋“。神秘甜品原來神秘甜品係由三款小甜品合併而成，分別係番石榴慕絲+橙肉金寶+香蕉芭菲併朱古力brownie。番石榴慕絲口感幾滑，配上番石榴果肉，令一向唔鐘意食番石榴嘅我都有對番石榴改觀。橙肉金寶不過不失，但好處係相當足料，有橙肉同西柚肉係中間。香蕉芭菲併朱古力brownie，brownie 好好食，充滿朱古力味，而芭菲味道普通，同一般芭菲一樣。