孖寶車仔麵 (已結業)

去荃灣搵食除左去路德圍之外，鄰近荃灣廣場嘅大壩街亦都係非常多餐廳嘅。今日想食個lunch嘅時候就見到一間佈置得幾靚嘅餐廳，原來係食車仔麵嘅，所以就入去試一試佢嘅手勢。車仔麵統一四十五蚊有三個餸，包熱飲，凍飲加三蚊，同埋指定嘅餸菜要加錢。今次就叫咗三個餸，包括牛腩，貢丸，魚肉春捲，配幼面同腩汁。牛腩分量唔算多，不過都幾冧幾入味嘅，貢丸就普普通通啦，冇乜特別，魚肉春捲就比較有驚喜，因為佢同南記嘅春捲差唔多，可能俾南記嘅細條小小，性價比都算唔錯架喇。凍奶茶嘅茶味道略為重，所以杯凍奶茶就苦苦地喇。有心思嘅位係每張枱都有普通菜甫和辣菜甫，我試咗辣菜甫，但就唔係好辣，總結嚟講呢間車仔麵都算唔錯嘅，有機會可以返嚟再食。