小火山 (已結業)

上網見到泰式打邊爐仲要係燒烤邊爐兩食，覺得好新奇所以同朋友嚟食。小火山牛骨船湯聞落去好香牛骨味濃郁，飲落去有少少藥材味，幾特別。 香茅椰汁雞湯 推介味道其實好似冬陰功湯， 飲落去酸酸辣辣，有椰汁嘅中和所以都偏小辣。 魷魚 推介❤️魷魚非常新鮮， 滾亦都好軟好林。 而且配合埋湯底嘅味道，帶到魷魚嘅鮮味。 同埋湯底亦都更似海鮮冬陰功湯。❤️燒烤拼盤 有豬肉同牛肉，牛肉本身調味比較濃放落去燒烤味道啱啱好。佢本身嘅醬汁係泰式醬汁， 青檸蒜頭辣椒味都有。 中和左肉味本身嘅調味。豬肉嘅調味就冇咁濃郁， 配合牛骨湯或者香茅椰汁雞湯，個味道就啱啱好。 豬肉牛肉嘅肉好林，唔會柴口！ 泰式芭拉魚露大蝦拌木瓜沙律🥗 大蝦爽口彈牙， 成個沙律嘅調味偏辣。 木瓜絲咬落去好爽脆，本身木瓜絲嘅清新甜甜地中和左成個辣味。鍾意辣嘅朋友啱晒。泰式奶茶 ， 泰式奶綠 呢間嘅奶茶幾適合香港人口味， 唔會好甜。 而且茶香非常重。 食辣嘢一定要整返杯，解下辣。