蘭芳園 (已結業)

又一個平常嘅工作日，同同事行左嚟食蘭芳園，聽食過嘅同事講呢度裝修幾特別，野食都過得去，就抱住驚喜嘅心情一試！環境：呢度嘅裝修的確幾有特色，好有舊式大排檔 同冰室嘅風味，打個卡都唔錯！而且地方都算大，中午嘅時間主要都係一班打工仔落嚟一齊食飯，感覺都幾正。食物：一入門口就見到一串串燒味掛曬喺門口，都估到呢度應該主打食燒味，果一日唔算太肚餓，就叫咗個燒腩仔紅腸瀨粉食，本身跟飯但係自己鍾意食瀨粉所以轉咗。呢度嘅燒腩仔都幾正，個皮又夠脆，係真嘅燒腩仔，啲肉起碼有三層，夠曬肥夠曬香。 不過老實講，見其他同事叫叉燒撈麵，啲叉燒真係削咗啲，又唔夠肥，又唔夠味道。所以叫叉燒真係要睇佢嗰日靚唔靚...雖然我唔知係咪個別例子，但係下次嚟嘅朋友可以試下燒腩仔，我今次食真心推介！