探花 (已結業)

近排愛上咗一盅兩件嘅港式點心所以就四圍睇有冇啲特色點心店可以試下，但係食得多總係覺得開始無咩新意。今次嚟到銅鑼灣呢間探花，佢嘅點心同出面嘅點心好唔同，好有特色。 而且最重要係佢嘅裝修同傳統茶樓唔一樣，行簡約現代風，入到去嘅感覺比較似喺西餐廳飲high tea多過食中式點心。話梅車厘茄子，酸酸甜甜嘅話梅汁浸住已去皮嘅車厘茄， 車厘茄充滿著話梅味又juicy又好食， 仲好開胃。蝦腸粉，雖然度度地方食港式點心都會有蝦腸粉，但係佢嘅豉油應該係特製嘅，比普通豉油特別鮮甜，配新鮮嘅蝦十分好食。竹炭雪山叉燒包， 黑漆漆嘅叉燒包覆蓋住酥皮，外脆內軟，而且佢嘅叉燒餡，亦都整得好香。晶瑩蝦餃， 佢嘅蝦又大又新鮮， 蝦餃皮亦都好煙韌， 十分好食。鹹蛋黃竹炭蘿蔔絲酥餅， 同出面嘅蘿蔔酥 一樣，但係佢係用黑炭做嘅酥皮，配上鹹蛋粉，好好食，蘿蔔絲清甜配鹹蛋黃粉， 簡直一流。松露片牛肝菌腐皮卷， 露筍配牛肝菌加上炸到脆脆嘅腐皮， 口感一流。黑虎掌花素餃，作為素餃其實即係什菌餃， 充滿菇味， 口感好好。最欣賞係佢嘅灌湯餃，花蟹肉罐湯餃除咗有蟹肉碎仲有蟲草花， 湯亦十分鮮味。整體上水準十分唔錯。