影片
更多
2023-04-30
358 瀏覽
💁♀️💁♂️ 27/4/2023(Thu), Dinner🍽除咗銅鑼灣一帶多食廈之外，鄰近既天后都有一座食廈，水牌上面唔同既層數都有各式既食肆。今晚💁♀️為食妙妙同💁A先生就去到7樓既叁不館食火鍋🍲。上到7樓打開𨋢門就見到餐廳裝飾懷舊，用上唔少本土特色既物品例如霓虹光管、竹籃、摺枱、木櫈等，加上播住八、九十年代既流行曲，就好似置身當年既大笪地食火鍋🍲咁。餐廳就連點菜單都設計成一份報紙📰咁，玩味十足。點完食物之後，侍應就會送上醬料，一大盤有十款醬料加埋火鍋豉油俾你自己調較岩自己既口味。侍應特別推介有以下三款：- 自家製蔥頭油：第二度見唔到有，好香既蔥頭味道，再𢳂多少少已經焦糖化既蔥頭，任何食物點一點都提香百倍；- 自家炒麻辣紅油：夠香夠麻夠辣，但又唔會太重口味蓋過食物既鮮味；- 自家製沙茶醬：比一般既無咁鹹，但好香沙茶味，提味之餘又唔會搶咗食物既鮮味相信餐廳自家製既醬料係刻意調到唔會太搶味，等食客可以調味加上層次之餘又食到食材既新鮮原味。而今晚我地order咗：🔆 今晚卜卜蜆鍋（$198）呢個卜卜蜆鍋用上雞湯，內裏有大量既蜆、芽菜、芹菜等。上枱時侍應建議先滾起湯底，等一等蜆卜卜聲開晒口之
💁♀️💁♂️ 27/4/2023(Thu), Dinner🍽
除咗銅鑼灣一帶多食廈之外，鄰近既天后都有一座食廈，水牌上面唔同既層數都有各式既食肆。今晚💁♀️為食妙妙同💁A先生就去到7樓既叁不館食火鍋🍲。
上到7樓打開𨋢門就見到餐廳裝飾懷舊，用上唔少本土特色既物品例如霓虹光管、竹籃、摺枱、木櫈等，加上播住八、九十年代既流行曲，就好似置身當年既大笪地食火鍋🍲咁。餐廳就連點菜單都設計成一份報紙📰咁，玩味十足。
點完食物之後，侍應就會送上醬料，一大盤有十款醬料加埋火鍋豉油俾你自己調較岩自己既口味。侍應特別推介有以下三款：
- 自家製蔥頭油：第二度見唔到有，好香既蔥頭味道，再𢳂多少少已經焦糖化既蔥頭，任何食物點一點都提香百倍；
- 自家炒麻辣紅油：夠香夠麻夠辣，但又唔會太重口味蓋過食物既鮮味；
- 自家製沙茶醬：比一般既無咁鹹，但好香沙茶味，提味之餘又唔會搶咗食物既鮮味
相信餐廳自家製既醬料係刻意調到唔會太搶味，等食客可以調味加上層次之餘又食到食材既新鮮原味。
而今晚我地order咗：
🔆 今晚卜卜蜆鍋（$198）
呢個卜卜蜆鍋用上雞湯，內裏有大量既蜆、芽菜、芹菜等。上枱時侍應建議先滾起湯底，等一等蜆卜卜聲開晒口之後，先食蜆肉同埋飲湯，感受湯底既鮮甜先，之後先開始打邊爐🍲。
蜆肉大粒飽滿，食落蜆味鮮甜嫩滑。芽菜爽口無草青味，吸收咗湯底既味道都好吸引。湯底鮮甜，加上蜆肉既海水🌊味，同埋芹菜既香氣，唔覺唔覺都飲咗唔少。
🔆 牛魔王拼盤（$468）
有極級本地手切肥牛、頂級安格斯牛頸脊、手切封門柳、鮮牛肉粒、牛胸尖同埋牛脷托各6件，整齊咁擺盤喺一個大盤上面，侍應會細心介紹返盤上面各款牛肉既特色，同埋各自既建議煮法。
- 本地切肥牛：肉味較濃一點，食落比較有咬口，喜愛濃肉味既A先生首選；
- 頂級安格斯牛頸脊：油花分佈平均，油香味重一點，入口嫩滑，食落肉味稍為不及手切肥牛；
- 手切封門柳：肉色比較深紅色，肉味帶一點內臟既味道；
- 牛胸尖：輕灼大約十秒就可以食，薄薄既一片咬落脂香豐富帶輕微爽口；
- 鮮牛肉粒：牛肉粒可以提早放落鍋，灼幾分鐘等到全熟，食落有咬口而有肉味；
- 牛脷托：食落比一般牛脷爽口有𡁻頭。
🔆 蝦膠油炸鬼（$78）
一碟有8件，4件係沾上蟹子而另外4件係沾上海苔。食法係將蝦膠既一面向下放入湯底，煮3分鐘就可以食。煮過之後蝦膠彈牙，油炸鬼依然脆口，食落口感豐富，油炸鬼又索咗湯底既味道，食落鮮味。
🔆 紫菜炸響鈴（$68）
響鈴中間夾住紫菜，輕浸幾秒吸咗湯底既鮮味之後，除咗響鈴既豆味，仲多一重紫菜既味道，都好好食。
🔆 棉花魚肚（$88）
A先生細個時去酒樓食雞札、棉花雞最鍾意食果件魚肚，吸收咗雞味同調味之後好食到不得了。今晚見到餐牌有棉花魚肚，A先生第一時間要剔✅咗先。放入湯煮一輪等魚肚變軟身同吸收咗湯底既味道之後，入口輕軟如棉，索咗鮮甜既湯汁好吸引。
🔆 雜菌拼盤（$88）
有冬菇、金菇、秀珍菇、雞髀菇、白菇、木耳、鮮淮山、豆卜等，份量夠晒大堆頭。之前未試過用鮮淮山嚟打邊爐🍲，煮完之後既淮山粉糯又吸收咗湯底既味道，有驚喜；其他菇類都新鮮，入口爽滑好食。
🔆 Asahi（$38）
🔆 支裝忌廉（$16）
🔆🔆🔆🔆🔆🔆🔆🔆🔆🔆🔆🔆🔆
❤🙆♂️(A先生)整體食評：❤❤❤❤❤(5/5)
❤🙆♀️(為食妙妙)整體食評：❤❤❤❤❤(5/5)
👉🏻 餐廳既懷舊佈置夠特色，侍應服務夠晒貼心，不時為我地添加湯底，又會細心咁介紹返每款食物既特點同建議煮法，等我地唔會煮過籠浪費咗美食
👉🏻打邊爐🍲最緊要係乜？除咗食材，梗係個爐啦，呢度個電磁爐火力強勁，即使岩岩上枱或者加完湯都好快滾返起，唔使慢慢等，打得爽快👍🏻
A先生車友指數 🚗
🛣️ 交通容易指數：🚗🚗🚗🚗(4/5)
🅿️ 泊車容易指數：🚗🚗🚗🚗🚗(5/5)
👉🏻 天后地鐵站上蓋有停車場🅿️，不遠處既維園泳池有大量錶位🅿️，只要唔係維園有展覽/活動，不難搵到泊位。
👉🏻 天后地鐵站過嚟都唔使5分鐘路程，地鐵、巴士、電車、甚至小巴都有唔少選擇
🔆🔆🔆🔆🔆🔆🔆🔆🔆🔆🔆🔆🔆
張貼
