祥勝茶餐廳

營業中

休息中

之前去過順興食滑蛋蝦仁飯既時候見到對面呢間祥勝茶餐廳都好多人等位，於是今日特登響銅鑼灣行過黎食。星期六既下午一點黎到，門口好多人等外賣，一行入餐廳發現係典型既麻甩茶餐廳，一張枱要搭好多人。我被安排坐響中間路口位，所以不幸地被人撞左好多次。見到好多人都點豬扒飯，貪心既我就點左百搭撈麵。呢碟撈麵一上枱既時候真係嘩左一聲，因為感覺真係好茶餐廳，撈麵上面除左有豬扒，仲有煎蛋，煎腸，午餐肉。豬扒咁多人食真係有原因，一咬落去感覺鬆軟而不痴牙，煎得好香，十分入味。但個麵就乾而無味….有點失望。另外仲叫左旦牛治烘底，鹹牛肉既份量好少，所以食落只感覺到煎蛋既味道，而冇牛肉既鹹香，所以建議黎呢度都係食豬扒最穩陣!