貓咪貓咪HOME (已結業)

醉翁之意不在酒，黎到貓Café，野食固之然重要，但最重要嘅當然係同貓貓相聚！入屋叫人，入廟拜神。黎到貓星人嘅屋企，當然要守返規矩！一入去就有兩隻貓貓守衛！餐牌有好多頁，但實際食物種類唔算多。都係一般樓上Café嘅格局，以小食、西式麵飯、甜品同特色飲品為主。可能原先期望唔高，食物水準喜出望外，份量夠之餘，味道仲非常唔錯！非常推薦呢杯甜愛愛朱古力，入面雲呢拿有雪糕同朱古力碎，甜度剛剛好。心太軟亦有水準，可惜食得實在太飽，食唔晒…Cafe入面有好多隻貓，各有各性格，非常可愛！有啲會跳上你張枱，有啲仲會捐入你個袋！一路食，啲貓貓一路四圍跑，真係好幸福。返咗成日工黎呢度玩完一晚，心情真係放鬆晒！