一條腸粉 (已結業)

有次唔舒服又想食少少野落肚，經過位於旺角既呢間一條腸粉就比佢既香味吸引左入去，鋪頭唔係好大但好有香港小店既味道係入面！入面仲為左我呢個乜都唔識既港女，介紹左乜嘢係汕尾菜添，我唔係咁舒服所以淨係嗌左佢既手拉腸粉，仲加錢加左蛋同菜脯添。由於佢係即叫即整所以上台既時候，腸粉既蛋香味湧晒上黎。去到最後我食唔晒碟腸粉，佢仲主動幫我轉成外賣裝拎返屋企食添，呢啲小本經營既餐廳真係好值得我地去幫襯，有心煮野食又關心到食客既需要！