尚品工房 (裝修中)

今日行開南豐紗廠去睇狗狗，想去附近食飯。行過旁邊嘅工業大廈見到有個西餐廳—「尚品工房」擺廣告，竟然週末都有下午茶餐，價錢實惠，我就行上去望吓。⭐️招牌係大大個白色燈牌，入到餐廳裝修有驚喜，係工業風格嘅裝潢，而且入邊擺咗多架單車，應該係單車發燒友開。枱凳都係用啡色木，令人覺得好舒服。店內仲放咗兩部機，其中一部係街機俾人玩樂，除咗食、有得玩、又有得打卡，係三重享受呀🫶🏻🍴主菜—老闆招牌菜避風塘炒意粉🍝西餐廳嘅意粉好少用避風塘方式炒，呢個菜式都幾特別。自家研發嘅避風塘汁唔算好辣，加咗蟹子炒，每一啖意粉都食到蟹子同海鮮汁，口感一絕。👍意粉係有少少咬口，但我同我朋友都覺得口感比平時軟身嘅仲正。下午茶菜式🍴香煎油封鴨腿用油煎香，鴨腿味道又香、外皮有d脆口，超邪惡。肉質嫩滑配埋健康嘅沙律菜，比例剛好。🍴迷你牛肉漢堡配薯條牛肉扒原來係手打牛肉，所以肉質比平時食嘅會更彈牙。漢堡內嘅滋味醬，亦係老闆自家研發，酸酸地更開胃。薯條粗身即炸，點茄汁好好食🤤套餐仲送特飲，款式定期會轉㗎。📸下次經過荃灣南豐紗廠都不妨到隔籬工業大廈嘅商品工房，試吓老闆親手整嘅西餐啦！