夢工房西日料理 (已結業)

最近工作都好忙碌，終於搵到時間去食好嘢啦，今次嚟到葵芳覓食，呢間夢工房西日料理，喺外面望入去裝修已經好吸引，就試吓佢啦。呢度嘅食物種類同一般嘅放題都差唔多，大家可以填紙任意揀自己鍾意食乜。呢度特別嘅係有爆谷機添啊，當你等緊食物未到嘅時候，可以食住爆谷同朋友傾住計先首先我哋叫咗壽司先，呢度壽司嘅飯量唔算太多，刺身薄切，食完都唔會話好飽，可以試多少少唔同嘅款。跟住就叫咗雞軟骨串燒，火候掌握得啱啱好，食落去好爽口。再有少少椒鹽係面，味道岩岩好！燒蠔有兩款唔同嘅口味，有蒜蓉同埋芝士，兩款都試左，蠔肉質厚，蒜蓉帶出咗鮮味，芝士食落去都唔流。呢度比起一般放題特別嘅係，有埋打邊爐，有啲蔬菜同埋丸嘅配料可以自己自助拎，而其他肉類就可以落單。肥牛肉同埋脂肪嘅分配都幾好，切得都夠薄，肉質鮮嫩，10秒就可以食得啦！最後點少得甜品呀，呢度有雪糕機可以自己整雪糕，同埋有好多唔同嘅雪條，仲有甜品櫃！ 鍾意食咩款都有！