8Five2 Restobar

營業中

休息中

今日放假唔使返工，晏晝約埋朋友一齊去8five2食墨西哥菜。呢度係酒吧連餐廳，地方夠哂大，outdoor位置有瓦遮頭，落雨都唔怕，約埋三五知己嚟chill吓，飲杯嘢傾吓偈happy hour認真一流。我同朋友連早餐都未食，所以首先叫咗個雞肉墨西哥脆玉米片開開個胃。Nachos有兩種唔同顏色既粟米片，仲有墨西哥辣椒🌶️，舖上Buffalo 雞絲同芝士醬，再配酸忌廉同牛油果醬，酸酸辣辣咁夠晒醒胃。雞肉份量相當多，足以令我哋每一片玉米片都可以搭配雞絲。芝士菠菜墨西哥酥餅總共有四大件，同樣配咗酸忌廉同牛油果，仲有用新鮮蕃茄製成嘅蕃茄醬。入面除咗有芝士同菠菜之外，原來仲有墨西哥菜經常出現既仙人掌🌵，口感同味道又多咗一個層次。我就鍾意佢入面有滿滿嘅菠菜，感覺冇咁濃味同油膩。旁邊嘅配菜顏色鮮艷，味道亦唔錯。西班牙海鮮飯加入咗墨西哥風味之後味道變得更濃更香，酸酸地既墨西哥汁，配上幾款唔同嘅海鮮，清新醒胃。最後食埋鹹焦糖芝士蛋糕做甜品，蛋糕上面加上食用花，令賣相更吸引，旁邊嘅藍莓同紅桑莓就能中和返芝士餅嘅甜膩。