kikusan (已結業)

黎到屯門見到周圍都排隊，唔想排所以試吓呢間日式x滬式x川式 fusion 菜。環境舒適，空間感足夠。午餐選擇都算多，用手機掃 QR code落單。我叫咗千層豬扒擔擔麵 $108，千層豬扒其實係一片片豬五花肉疊埋一齊炸，幾特別但唔係特別好味 擔擔麵偏向川式，比較辣，唔夠花生醬味，整體上OK。老公要咗水煮魚拉麵 $118，魚肉好嫩滑，味道都不錯。午市套餐包飲品、點心或者涼拌小菜。我哋都叫咗點心，有豬肉小籠包 + 菠菜皮蝦餃，小籠包普通，樂天皇朝好食好多，而蝦餃就幾好味，有驚喜。照計呢個係前菜，但唔知點解一落單大概兩分鐘個主食就到咗，點心就等咗十分鐘。飲品要咗熱柚子檸檬蜜，正正常常。試過一次就算，應該唔會特登返轉頭，如果同我哋一樣懶得走去隔離排隊，都不妨一試。