樂天皇朝 (利舞臺廣場) (已搬遷) 新店位置

慶祝母親節，帶媽咪去食佢最鍾意嘅上海菜，見到七彩顏色小籠包就吸引左去試下。有分店內店外，入面就較為暗，卡位會有個屏風分隔，好寬落唔迫，中間仲會有個小池，成個環境幾有氣氛又古香古式。星期五可能太多人，待應忙到走黎走去，好難叫到佢地，但上菜速度極快。食物就不過不失，款式都好多，可惜岩我家嘅唔多，必食嘅食物都可以有更好嘅選擇。今次五人食，叫左八樣，用匯豐信用卡，每人大約$180。皇朝小籠包整體每款味道都好濃好香，湯都有好多，但個皮就相對厚身。正宗重慶水煮魚小辣已經好辣，個種辣係一放入口就辣，而唔係慢慢咬幾咬先滲出黎。魚肉好嫩好滑，可惜個分量唔多，一大鍋得十一二塊左右，下面有豆芽同薯粉，薯粉吸哂味，辣得過癮。成都口水雞雞肉滑口，醬汁較杰身，面會有花生碎，而辣味比水煮魚嘅小辣更辣。上海生煎包個底煎得唔夠脆，變左同食普通蒸包一樣，湯汁都唔多，個舊肉係幾大。風味沙拉排骨沙拉醬偏甜，而排骨整得好鬆化，分量都唔少又大塊，好食。菜肉雲吞湯拉麵拉麵幼身，煮得夠彈牙，吸收哂個湯味，湯豬骨味濃而又唔咸，雲吞大粒，肉多菜少。開陽蔥油拌麵食第一碗時食覺得唔夠香，但麵質口感好好，無痴埋一團，又唔會太油，配個湯清清地。