津津茶餐廳

營業中

休息中

今朝要覆診抽血，零時起冇嘢食，九點去到西營盤人山人海，搞到幾乎十一點，噢！好肚餓。西隧貴舊隧塞，諗住行東隧，東廊途中灣去模範邨去好耐冇去嘅津津。泊車周圍都滿又搞一輪。話說好耐以前我仲係公務員嗰時，間唔中都要上堂，上襯都係嚟北角政府合署，若果有老世或一大班同事就通常飲茶，但若一條佬就一定嚟津津食鹽焗雞飯。次次都係座無虛席，所以真係只有一條佬嚟先插到針！今日卡窿時間嚟到所以先咁少人，仲嗌早餐？唔係啩？趁住就大壽一於食豪D：鹽焗雞肶珍肝飯、例湯。(一償永合隆冇雞什相思之苦)哇！您睇睇個飯，D珍肝真係滿到瀉咁滯，好在我膽固醇冇事，雞肶當然滑，而且又香又夠味。同永合隆撞湯，都係煲豬肺，不過津津係金銀菜 — 菜乾+白菜 — 而且除咗豬肺仲有豬肉，比較下津津個湯濃D合隆個湯清D，真係各有各好，有時鍾意艷麗有時又愛清純嘛。作為一個brunch，呢餐夠perfect！承惠72！係就係仲貴過永合隆，不過又食肶又加肝，係咁上下啦！