津津茶餐廳

營業中

休息中

招牌鹽焗雞果然有料到，嚟到呢度真係唔好叫雞飯，直接叫例牌或者半隻鹽焗雞再嗌白飯先至夠喉，始終鹽焗雞飯得嗰幾件雞邊度夠食，佢呢度嘅雞真係整得好好味，份量又足，而且仲跟埋雞腸雞潤雞腎呢啲內臟，精彩超凡。跟手叫多碟咕嚕肉，份量又係比想像之中多，煮得夠鑊氣，味道唔錯。食太多肉就梗係要叫返啲菜平衡吓啦，因為呢度有粉麵，所以就可以叫粉麵舖嗰啲油菜，比炒菜更健康，因為冇咁油，而且仲可以好似我咁樣要碟油菜全走。呢度杯奶茶都幾好飲，真係要傳統茶檔先有呢一種味道。

撞正午飯時間來食成場都係地盤工人，係平民級美食呢度都係以食雞飯為主，成場都食同一個飯咁滯🤣🤣雞好夠咸唔洗點汁就咁食都好食，肉身好滑。雖然唔係去骨同我都唔鍾意食骨，不過都好易入口唔難吐骨食物ok，不過裝修好老舊，唔係好坐得舒服

自從上一次有Friend帶我黎呢間茶餐廳朝聖之後一直念念不忘佢嘅招牌雞，2百幾蚊成隻，仲要係好大隻兼連埋雞潤雞腎雞腸雞心係無雞忘記，性價比高到無朋友，所以今日路經此地就忍唔住入去買咗一隻返屋企食，家人都大讚好味道。佢隻雞2百幾蚊一隻，一定唔會係新鮮雞，估計係冰鮮雞，但係就係估唔到冰鮮雞都可以整得咁好食，隻雞都幾大隻，都幾有雞味，而且隻雞唔係好肥，雞肉鮮嫩，珍肝都好食，有機會真係要試吓。

已經嚟食咗十幾次，次次都為佢嘅珍肝雞嚟。雞有雞味，雖然老生常談，有幾多餐廳做到。但講到珍肝，真係無人能及，咁多次，咁多次都好好食，香口有咬口有質感，唔係求其切粒交貨。另外個環境都係可遇不可求，嗰啲手寫嘅靚字餐牌，嗰啲有人情味嘅伙記，呢個年代真係要好好珍惜。

鰂魚涌平價碟頭飯，正常冇伏鹽焗雞飯！・・・・・・・・・・・・・・・・・・・・🐤 鹽焗雞飯 HK$45・味道：鹽焗雞件乾身但唔柴，正常發揮啦，最正係個沙薑醬，好惹味。$45呢個價，冇嘢唔滿意lu！鰂魚涌扮工之友必識！・口感：個飯都有吸到鹽焗雞嘅汁，幾好食XD🍝 叉燒燴通粉 HK$52・味道：叉燒好柴，番茄好酸，蛋正常（好難出事），算係燴得幾乾身唔會濕立立咁(ㆀ˘･з･˘)・口感：啲叉燒真係好柴，柴到吉口嗰隻⋯⋯・・・・・・・・・・・・・・・・・・・・🤰性價比：中～🤰9衝度：可試～🤰結論：普通，冇伏，平價，要快食可試，完！・・・・・・・・・・・・・・・・・・・・

今次撲去了間茶餐廳，想試吓咁多人讚的鹽焗雞。🐔 嚟到，一眼望去，環境OK啦，有啲老舊，但有種懷舊feel，港式茶餐廳嘅味道足足嘅。喺度進攻咗鹽焗雞飯，天啊！個雞香味撲鼻而來，真係好想即刻鬥佢！肉質嫩滑得嚟帶點微鹹，啖啖肉咁誇張嘅話，真係要叫做一流！同碟嘅白飯又香又軟，配埋個雞，簡直match到暈！🍚喺度仲有咩好食？炒菜心了！ 那個菜心啊，滑溜溜、鮮美、脆口，做得好有水準，完全冇灰味，箇中嘅甜，係舌尖嗌你唔好走嘅味道！食咗咁多，心裏數下價，咩？！揾我唔多過百，咁抵食嘅地方，我下次仲要嚟！😋 為咗個雞，真係可以再戰三百回合，唔怪得啲人咁讚喇！只不過，周末黃昏咁清閑，嗌得我有少少心疼，希望佢哋生意足啲，呢啲好滋味豈可獨擋？

若然你喺鰂魚涌或者北角返工，應該唔多唔少都聽過津津呢個名，佢正正就喺正橋底，所以都有啲人會講橋底雞飯又或者講句橋底就知邊間。佢嘅鹽焗雞飯真係我食過數一數二咁好食，一來個飯好味，吸左鹽焗雞嘅汁，個飯十分之香，濕濕地唔會太乾，夠哂味。二來個雞十分嫩滑入味。而呢度最具特色一定係食埋佢喺雞肝同雞珍，同樣經過鹽焗，入口十分之爽脆，而且沒有了內臟嘅腥味，好食。要以要食一定係食珍肝雞飯或者珍肝雞脾飯，咁就真係相當滿足喇。

用世一鹽焗雞去稱呼呢度嘅雞真係可能有d誇張咗，不過如果加埋價錢去比較就真係未必無可能。上面幅相碟雞係半隻份量，大碟到除時可媲美一隻，仲要連埋雞什比你，如果無記錯呢碟雞係$110左右，雞味香濃，肉質都算幾滑，真係好好食。佢個蝦仁炒蛋都唔錯，蝦肉都有彈性，d蛋都算滑。Lunch Time時段都幾爆，好彩早少少去搵定位等個friend放lunch先至可以兩個人食到呢個咁豐富嘅lunch。另外佢杯奶茶都幾好飲。

聽朋友講呢間係鰂魚涌嘅隱世食店，講到一定要試！而佢又正正開中我個範，有鹽焗雞同埋雞腎，所以今次一定要慕名而來。環境就唔需要多講，舊式嘅茶餐廳都係嗰啲情懷嘅裝修，同熟客已經好似朋友嘅態度，亦都唔會特別好禮貌對住生保既客人😂午餐一個人唔使等，因為一定可以同到其他人搭枱食。今次就試咗個鹽焗雞胗肝飯，即係有鹽焗雞，雞潤，同埋雞腎。單叫冇嘢飲，成為$58。如果好食又係呢個地段嘅話，其實唔算貴，而且份量正常，食得飽你。一嚟到即刻啪返嚿雞，一咬落去鹹到我懷疑人生😵‍💫😵‍💫😵‍💫同埋我冇叫雞髀，好多都係雞胸連骨，但因為每嚿斬得比較細舊，所以其實舊雞連骨有好多碎骨跌咗出嚟，做唔到啖啖肉嘅效果。雞膶一樣都係正常發揮，唔係特別好食，但係如果你平時接受到雞膶係可以食落去。反而我最愛嘅雞腎真係有啲失望，口感唔係我預期中嘅爽脆，有少少淋同韌。至於除返配嘅鹽焗雞醬，都係一點就鹹上加鹹。整體嚟講，佢係一個普通嘅碟頭飯，如果當普通午飯嚟講佢係不過不失。但係由於我個friend係我食之前不停盛讚呢碟飯真係好出色🤐令我感覺有啲落差

下午茶時間好鍾意叫西多士，雖然邪惡，不過真係好有吸引力，尤其是喺舊式茶餐廳嘅西多士，要用呢隻太古糖漿樽，先至有Feel，呢間茶餐廳就做到晒以上的要求。佢個西多士雖然唔夠挺身，不過勝在炸得夠透，唔會外面金黃但係入面仲仍然保留住方包咁嘅樣。當然如果佢舊牛油係真牛油而唔係植物牛油就會更好，另外佢杯凍奶茶仲唔錯，呢D舊式茶餐廳就係有風味。

呢間舖經過好多次都無入去食過但聽朋友講話啲雞好好食😋今次一於黎試下啦嗌左個菜乾湯 都幾足料🙆🏻‍♀️飲落亦好補係有小小油之後到今日既主角 - 鹽焗雞😆睇落雖然平平無奇但啲雞食落又好滑 非常enjoy個飯略嫌咸左少少本身雞個鹽味都出既白飯好似都加左啲咸雞汁所以整體好咸

呢間都真係一間低調小店，無諗過佢嘅鹽焗雞咁掂，價錢又平到無朋友，極力推薦。我哋兩個人食晚餐，叫咗半雞鹽焗雞，一碟焯菜心同埋一碟咕嚕肉，加兩罐可樂，夾埋先至係$247，而每碟野嘅份量都幾大碟(焯菜心除外，唔係細碟而只係正常size)。半隻鹽焗雞真係算大碟(定係其他地方的太細碟？！)，隻雞好嫩滑，肉質新鮮好味，雞味濃，而且仲有雞肝雞腎雞心，真係好正。咕嚕肉味道都唔錯，個汁唔會太酸，菠蘿青椒洋蔥嗰啲配料都ok。蠔油焯菜心就正常發揮啦。

呢間舖頭雖然喺正電車路，不過如果齋喺門口睇真係經過100次都唔會知佢係好野。呢間隱世小店嘅鹽焗雞真係非常出色，一碟雞飯根本唔會滿足到我，所以黎親都起碼要半隻雞。佢嘅鹽焗雞一d都唔肥，雞味濃而且雞肉滑，半隻雞會跟埋雞什，一啲都唔孤寒，點埋佢個沙薑汁味道會更濃。佢個價錢仲要平，真係好值得山長水遠黎試。

成日社交平台都見到唔少人推介呢間茶餐廳自己就成日都經過呢間餐廳但係都冇特別話想試餐廳嘅位置唔算起眼行過都好容易遺忘咗佢最近見好多人都推介就一於同同事一齊試吓本身都冇話太大期望因為都諗住係碟頭飯我哋分別嗌咗個乾炒牛河同埋胗肝雞飯另外仲跟咗餐湯乾炒牛河就比較一般味道同鑊氣都唔係好夠如果雞飯就非常之值得一讚一食就知道點解佢可以做足咁多年有咁好嘅口碑絕對係唔係間間餐廳都做到嘅味道由米飯已經食到餐廳嘅心機通常出面茶餐廳嘅米飯都係比較乾身同埋偏硬但係呢度嘅米飯係少有好食嘅質素雞腎同埋雞潤 都有鹽焗嘅味道鹹淡適中隻雞都相當嫩滑 係一個非常高質嘅碟頭飯另外餐廳嘅餐湯都非常有誠意係我好鍾意嘅菜乾湯仲要係非常足料呢類嘅懷舊老店越來越少嚟呢度除咗欣賞下佢嘅食物之外都要好好感受吓呢度僅餘嘅風景相信喺香港只會越來越少見

現金，八達通。服務態度：舊式老店慣性，態度不可一世，麻麻地，好似想你食完快啲走咁嘅樣。環境方面：卡位8張圓枱3張，地方細，坐得迫，食飯時間真係面對面食野，仲面無野相隔，如果大家怕疫情就真係唔好係繁忙時間嚟食。食物質素：雞好滑，夠肥但無咩脂肪。味道都好入味。配合醬汁一流。性價比：一般，一分錢一分貨，這質素這價錢合理，但無套餐，飲品就有點不合理。總結：經過一定會再食，今次再嚟係因為上食覺得好食。好味指數😋