香湘辣妹 (已結業)

SPICY GIRL係間好有風格既餐廳，所有菜式都以周杰倫既歌曲為名。雖然如此，但如果落單時講歌名，侍應唔一定會明架。以下呢道菜叫雙節棍（羊肉棍）。聽個名已知架勢，食落香口、外脆內軟，亦無想像中咁油膩，有8/10。1分扣在價錢上（＄25/碌），另1分扣在味道上，太多香料，有少少咸。總體而言，呢道菜係值得推介！串燒蝦份量相當夠，我地4個人食每人都分到差不多4隻蝦。起初見佢成盆都係辣椒仲怕會好辣，但係食落又唔係咁辣，而且好香口，味道好足，令人停唔到口好想不停食! 唯一可惜既係D蝦比較細隻，不過肉質唔錯，非常推薦既一道菜! 涼伴木耳一聽就知道係前菜嘅涼伴木耳，開頭仲怕唔夠4人份量，點知黎到分量適中，夠曬我地四人作為開胃嘅一道小食。同其他店嘅涼伴小食唔同，呢道菜辣味比較重，但又唔會辣到要不停飲水，而果種辣味又唔會蓋過涼伴嘅酸味，可以話係酸辣味嘅調教做得好好。而且呢道小菜上到枱嘅溫度帶涼，唔同其他店上到枱已經係室溫，突出到涼伴嘅效果。總括佢味道同菜色嘅溫度，我覺得呢道係一個非常有風味嘅開胃小食，食過一定會再想食！