文輝墨魚丸大王

營業中

休息中

無論係門面裝修定話係店裡面嘅格局，文輝墨魚丸大王都係一間典型嘅港式麵舖，入到去真係好有地道風味。但其實唔單止係舖頭嘅外表，就連員工嘅工作方式都極之傳統，猴子幫襯當日就親眼目睹一項差啲失傳嘅奇技。猴子眼見佢哋員工落單嗰陣係唔會有落單紙寫低客人要乜，亦唔會有銀碼單寫畀客人，佢哋會直接嗌入廚房，而員工又會記得邊個客人點過啲乜嘢食，然後將食品送到客人面前。埋單嗰陣，員工只需要望望你食過啲乜，然後直接嗌收銀員收幾多錢，成個運作過程係唔需要任何紙張，可以話係環保嘅先鋒達人。講返正題，猴子今日試咗佢哋嘅紫菜四寶粉。河粉係幾滑溜，加埋紫菜更加一流，而魚皮餃、魚蛋同墨魚丸等都係幾港式嘅傳統魚蛋粉味道，而且份量都唔少，肚餓去就最啱。