御名園 (已結業)

今晚同屋企人黎食晚飯，環境舒服而且食物質素好高，每個菜式都好好食!晚飯組合 (脆皮燒雞+蒜蓉粉絲蒸蟶子)呢個其實真係好抵食，蟶子一人一隻而個份量係超大隻既蟶子皇!! 新鮮蒸再加上時間掌握得好好，加埋入哂味既粉絲同埋大量蒜蓉，基本上冇得輸! 燒雞都係賣點之一，好少地方可以食到皮咁薄咁脆既燒雞，完全冇肥膏，咬落乾爽又惹味，保留埋肉汁，真正做到皮脆肉嫩!黑豚叉燒皇另一個特色不過要接受佢既腩排，所以相對會較肥。但係叉燒的確係半肥瘦既最好食，炭烤既味道濃郁再加上少少燶邊，甘香又唔會好油膩，送飯一流!鮑魚汁花膠炆豆腐即使係食菜都可以好名貴，整體炆得好入味而且夠哂足料，花膠厚身又爽口，豆腐份量有好多而且都係好滑身!西澳龍蝦伊麵底價錢唔係最平但質素真係相對好高! 龍蝦大大隻而且蝦肉好大粒，拆好哂肉好容易食! 整既時間岩岩好，每粒龍蝦肉都好爽口彈牙又入味，配合埋索哂湯既伊麵，真心好出色!