好好便當 (已結業)

經過俾佢個鋪面吸引咗，好有台灣風味，裝修亦十足台味，係咁播我哋一定識唱嘅台灣歌，所以本身期望都幾高。唔想食太多炸嘢，所以點咗個大炸雞扒便當 ($58)同葱爆貢丸乾拌麵 ($46)，另外再加個蒜香台灣香腸 ($12)。價錢唔平，但如果好食嘅話都合理。結果真係令人出乎意料地失望，炸雞扒好深色，似係用萬年油炸或者炸到過哂龍咁嘅款。葱爆貢丸本身為係用葱爆炒貢丸，點知原來係炸嘅葱餡包心貢丸，不過係全餐最好食嘅嘢。便當同乾拌麵都係用同一種肉燥汁，只係得甜味，或者可以話係無味。滷水白蘿蔔好深色好似好入味咁，但又係得個甜字。仲要啲高麗菜係完全無煮過都算，俾哂啲菜頭我，根本無諗住我會食咁。最後，台灣香腸雖然都好食，但只有一條我隻手指公咁大粒嘅，咁就$12......整體來講，只可以話係虛有其表，完全唔好食。