老二花廳 (已結業)

第二次嚟老二花廳食飯，啲嘢食好好食，可以同朋友慢慢食住傾。朋友都話一嚟到以為搵錯門口，因為係唐樓上面，條樓梯好殘舊同陰暗。上到去，環境好懷舊，好多六七十年代嘅裝飾同擺設。我哋一行四人叫咗一個沙律、兩個小食同三個主菜，好飽好夠食。首先係大蝦柚子雜菜沙律，個大蝦好爽口彈牙，沙律唔係剩係得菜，仲有藍莓、士多啤梨同柚子，好豐富。之後小食就到芝士薯條，個芝士唔會好漏，配熱辣辣薯條食好好味！而個小食拼盤都好大碟下，有雞翼、薯角、炸魷魚、炸洋蔥圈，即叫即整，好香脆。主菜有兩個麵一個飯，個人偏好鍾意肉醬闊條麵。肉醬闊條麵：好多肉醬，啲麵夠彈牙，上面有芝士。西班牙芝士焗海鮮意粉：辣辣地、芝士味唔太重。黑松露海蝦意大利飯：好多蝦，黑松露味唔強烈，適中混入飯粒內。成餐都好好食同好滿足，環境唔錯，幾好坐，不過今次坐高檯，檯上盞燈好低，拎嘢食嗰陣好易揩到啲塵。