M3 Italian (已結業)

同朋友喺沙田第一城做運動，之後個肚有啲餓想搵嘢食。行到河畔花園，見到呢間餐廳，畀門口個餐牌吸引咗，一個500蚊嘅二人套餐，有餐湯、主菜、小食同埋甜品，非常吸引。見到人唔算好多唔需要等位，可能因為平日嘅關係。餐廳職員服務非常好，安排座位時有問我哋想坐邊，食嘢嘅過程中亦都不時留意我哋嘅需要，非常細心。餐廳嘅環境比較寬敞，坐位闊闊，坐得幾舒服。首先附送兩個餐湯，係羅宋湯，酸酸地可以幫助開胃。另外仲有麵包送添。前菜揀咗大蝦沙律。大蝦有三件，用炸嘅形式煮成，少少熱氣不過真係脆炸香口。主菜揀咗意大利飯配野菇同埋黑松露。飯非常香口，而且份量幾多幾抵食，賣相都非常吸引。另外點左烤美國安格斯肉眼扒。店員問我哋想食幾多成熟，我哋揀咗七成，果然啱啱好。肉眼扒係餐廳嘅招牌菜，款式都幾多，不過跟餐嘅就只有呢款，值得一試。甜品揀咗焦糖燉蛋，冇想像中咁甜，但係熱辣辣，細啖細啖食落非常滿足。幾鍾意呢間餐廳嘅環境同埋食物質素，第時黎開都可以再幫襯。