泰聚 (已結業)

如果唔係朋友簡嚟呢度食，真係唔知有間泰國餐廳喺度。其實地點唔算偏僻，天水圍站落到地面；一出遠望就見到餐廳唔怕行錯。餐廳有2層再加露天位，如果天氣涼/無落雨嘅話；其實坐露天位都幾好feel。今晚我預訂咗室內位置，餐廳安排咗我地坐1樓。不過叫親啤酒，唔知點解都要等好耐...原個菠蘿鮮蝦雞肉炒飯，酸酸甜甜；小朋友都食咗一大碗。醃肉碎生菜包，呢度仲可以簡牛肉/豬肉/雞肉，幾貼心。我地簡咗豬肉，辣味適中；肉碎唔會炒到乾柴仲有肉汁。鹽燒原條烏頭，條魚燒得好好；個辣汁調得仲好。怕腥味嘅朋友，點汁後完全無問題。泰式小食拼盤（小），份量都好大。春卷炸得香脆，蝦餅好味。見到隔離檯order咗個大（超大盤），好彩落單時侍應建議細都夠食。沙爹串燒，燒得過咗龍；所以肉質偏韌。但沙爹醬調得好味。鮮蝦刺身夠大隻，食落肉質好彈牙。甜品點咗香芒椰汁糯米飯＋泰式甜品拼盤。估唔到呢度嘅芒果糯米飯，係o家。泰式甜品一向都偏甜，小朋友鍾意。