Bigger Burger Cafe (已結業)

黎開佐敦諗唔到有咩食，行行下見到白居士街有間食西餐嘅。門口顯示嘅餐牌有超值套餐，唔使一百蚊，包蒜蓉包、餐湯、主菜同埋飲品，性價比高，於是決定幫襯。餐廳氣氛好好，播住背景音樂，係樂隊嘅歌曲。牆上掛住以黑膠唱片為主題嘅佈置，配合燈光，裝修都幾有格調，好有西式風情，見到唔少外國人幫襯。我同朋友兩個人一人叫咗一個套餐。我點咗西冷牛扒配薯仔，同埋田園沙律。西冷牛扒揀咗七成熟，但係上菜發現應該唔止七成，所以有啲煙韌。但係牛肉嘅味道香口，仲有一層肉汁。份量好大，有好多薯仔。田園沙律都幾新鮮。朋友就點咗香酒龍脷柳伴檸檬牛油汁，再配薯蓉，份量比牛扒細一啲，不過食薯蓉都幾飽肚。賣相就唔算好吸引，龍脷柳有啲單薄，不過味道有啲酒味幾特別。個湯係蘑菇湯，幾香口，不過唔算好大碗，好彩仲有嘢飲。點咗橙汁。不個橙汁太多冰，放一陣就已經沖淡咗橙汁嘅味道。整體嚟講，餐廳嘅性價比高，環境都幾好，有機會會再嚟。