滾喜火鍋專門店 (已結業)

兩個人想打邊爐，喺openrice揀左好耐唔知揀邊間火鍋店好。任食火鍋太趕時間，唔岩一邊食一邊慢慢傾計，其他火鍋店又坐得唔舒服。最後見到呢間滾喜啲坐位幾舒服，全部卡位，又好似幾乾淨企理，就決定試下。經openrice訂枱有7折，開頭都擔心係唔係伏，做7折唔知係咪好難食所以做特價。去到火鍋店，因為有訂枱留左個角落既卡位俾我地兩個。揀左莞茜皮蛋湯底...個湯底等左好耐，個鍋都未到，啲野食已經到左。聽店員講個湯底係即整所以比較耐。黎到飲左碗湯底，真係新鮮清甜啵，好足料，有豆腐，有馬蹄，當然仲有主角莞茜同皮蛋啦。感覺上好清甜無味精。啲火鍋料都幾好，幾新鮮。最唔新鮮係啲生菜有黃邊同埋腍左唔太脆身。除左生菜，仲叫左個蚌肉，什菇，竹笙，牛柏葉，同埋豚肉。樣樣都新鮮，分量都足。叫左扎竹蔗茅根，好似好足料唔會太甜。但個壺入面啲料唔知會唔會重用。店員都幾好人，幾nice! 請佢地幫手催下單都會跟。仲有個廁所都幾乾淨！加分！成餐都幾滿意！唯獨係上菜時間慢，但打邊爐都係慢慢食，所以可以接受！2個人埋單$366。下次會再幫襯！