INN - I’m Not Nothing (已結業)

經過元朗見到呢間Cafe環境都幾靚，所以就揀咗呢間食晚餐。見到餐牌，食物都唔算太貴，我哋一行兩個人叫咗一個羊架、一個黑松露薯條、龍蝦意大利飯。叫咗一杯朱古力香蕉奶昔同埋白桃茶。黑松露薯條有一個黑松露醬，用嚟點薯條一流，會令啲薯條冇咁乾。另外，薯條都好重黑松露味，食到停唔到口。而龍蝦意大利飯都好有驚喜，隻龍蝦啲肉都好有彈性，個意大利飯好重菇菌味，好入味。羊架一定要叫，我哋叫咗七成熟，切開真係感覺七成熟，因為我真係好驚一啲餐廳明明要七成但係入邊就熟得滯。羊肉咬落去完全唔會硬，好淋。而且羊架唔會太騷，就算我朋友不嬲都唔太好羊肉嘅都覺得好好食。整體來講，呢間餐廳都非常值得大家嚟試吓，環境舒服，而且嘢食真係好好食。