新泰東南亞餐廳 (太子集團中心) (已結業)

就到月底岀糧，同事話不如岀去食餐好嘅，大家都ok就約咗其中一日放工去食泰國嘢。前菜嗌咗兩款菜式，首先係「越南烤蔗蝦」同「泰式街邊豬肉串」，明明係泰國餐廳，點解會有越南菜式？我都唔知，我淨係知個蔗蝦好食，入口啖啖蝦肉，再加埋啲辣醬仲正。串燒半肥瘦啱啱好，點埋個秘製醬汁另到佢更加好味。我哋每次食泰國嘢都一定會叫個炒花蛤，見餐牌有「泰式炒花蛤」諗都冇諗就嗌咗，另外好似冇菜食差咁啲所以嗌咗個「飛天通菜」。花蛤炒得好香口，對我嚟講都幾辣。咁食泰國嘢點可以唔嗌咖哩同冬蔭公，所以點咗個「泰式青咖哩豬肉」同個細嘅「冬蔭公湯」。咖哩我哋冇叫到飯，反而係叫個蒜蓉包，一樣咁夾，冬蔭公好鮮甜但係對我嚟講好辣。重點介紹最後兩款主菜，分別係「泰式明爐魚」同埋「泰式蝦炒金邊粉」。金邊粉賣相好吸引，而且好足料，有幾隻大蝦仲要蝦肉爽口彈牙。烏頭魚肉好鮮甜，熟得啱啱好，味道酸酸甜甜好開胃。最後要埋個甜品「芒果糯米飯」，糯米有兩種，芒果清甜，加埋啲椰漿食飽好滿足。另外因爲我唔係好食得辣，叫咗杯芒果沙冰解辣。整體而言，新泰可以話係尖沙咀top3泰國餐廳，反正冇得岀境去泰國，就嚟新泰止下痕先。