Glasshouse (國際金融中心) (已結業)

IFC 4樓平台有幾間餐廳都擁有落地玻璃，可以望住海景，有outdoor 可以坐，環境一流，當晚見到好多外國人外賣啤酒喺餐廳出邊平台享用相當熱鬧。今次揀左呢間glasshouse ，晚市分咗兩個時段只有1.5 hour所以食得比較趕，不過食物整體來講都算唔錯。龍蝦湯味道算濃郁，配左兩塊蒜蓉包脆脆地唔錯小食拼盤每款小食都出色，魷魚鬚春卷熱辣辣脆卜卜，粟米蝦餅好彈牙，雞翼牛肉豬肉串燒惹味，配埋沙嗲汁同酸甜汁食到停唔到口啊！黑胡椒醬烤雞炒意粉呢個意粉都幾特別，下面有一層蛋漿，意粉用黑胡椒醬炒但味道不算太出色，烤雞唔係件件都咁稔咁滑，所以只係一般。Very berry cream foam其實佢係士多啤梨沙冰，加左少少cream，賣相幾靚，唔甜但冇咩特別Banana creme brûlée 值得一試，香蕉佈滿焦糖味加少少酒味，布丁好滑好香蛋味唔算甜，旁邊有杯expresso，waiter 好細心叫你唔好一次過落，我就續啲續啲加落去因應自己嘅口味，苦苦地但係我覺得更加有層次，兩種食法都好食。