Domon 居酒屋 (淘大商場3期) (已結業)

今日過嚟九龍灣呢邊食飯，淘大商場真係好多好選擇，咁啱我同朋友都想食日本嘢，所以就試吓呢間。座位好闊落坐得好舒服，兩個人靜靜地傾吓計真係唔錯。《炸雞軟骨》$38基本上食日本嘢一定會帶呢款小食，炸得好脆，同埋唔會好油膩，越食越開胃。《黑松露牛拖羅卷》$98呢個睇相已經覺得非常吸引，又長又大片嘅牛肉，仲要係半熟，好嫩好好味，仲有黑松露呢個完美配搭，壽司飯都有返咁上下足料，推介。《土門青龍卷》$88呢個嘅主角係吉列蝦，好酥脆 配埋中間嘅青瓜黃瓜，口感真係好好，好好味。《一夜干》半條$78一直都好鍾意食日本嘅燒魚，呢條一夜干燒得好味，厚肉有魚油香，唔會乾，食得出即燒。《山椒黑豚拉麵》$88辣嘅拉麵比較少食，更何況呢個係山椒，所以大膽嗌咗嚟試，估唔到又幾好味，山椒味好出，豚肉亦都好多，拉麵就相對普通，唔係手製，但整體都好食！ 總括嚟講，呢間日本餐廳選擇好豐富，而且價錢真係唔貴，呢一區來講都幾抵食。