咖啡弄 (已結業)

想悠閒咁食個午餐，於是諗起台式cafe，諗起咖啡弄。12:15度去到，唔需要等就可以入座。牛奶冰棒可可亞牛奶係雪成冰棒狀，倒入熱既朱古力攪勻就成為朱古力奶。要自己動手去製作，感覺係特別啲好玩啲。朱古力奶味道濃郁，好飲。另外，佢有兩塊朱古力附送。熱水果茶佢用lipton茶包，加上好多水果沖泡而成，有熱情果、橙、蘋果、檸檬同青檸。第一啖飲覺得好香熱情果味，但好酸。飲到最尾一杯時覺得好甜，要自己倒啲水入去沖淡一下。草莓冰淇淋鬆餅個賣相好吸引，士多啤梨大大粒，上面鋪滿士多啤梨醬，顏色鮮豔。士多啤梨下有雪糕同吉士醬，配埋鬆餅一齊食，好夾。鬆餅質地好厚實，如果一個人食晒可以當做正餐，好夠飽。總匯三文治份量都幾大，有三份三文治。入面有雞肉、火腿、蛋、蕃茄、青瓜同生菜，好足料。另外，配有芝士粟米片同蛋沙律。總括黎講食物質素幾好、份量好大，最好share黎食。環境方面，枱與枱之間既空間有點窄，隔離枱走既時候，佢條褲掂到我地既食物，唔係咁衛生。