許留山 (已結業)

食飽飯有少少意猶未盡, 所以決定去搵甜品食, 師傅覺得銅鑼灣區可以選擇嘅唔多, 奈何唔想去滿記, 唯有四處碰碰, 可惜都係搵唔到, 最後師傅行到熱辣辣, 就求其搵間算啦! 一坐底等左好耐先有阿姐黎執枱, 人手唔夠, 再睇下有咩食, 最後師傅就要左凍靈芝龜齡膏, 而友人要左西瓜柚子西米撈! 等左一陣就有得食, 先講下個左凍靈芝龜齡膏, 坦白講師傅真係唔識分咩龜齡膏係好味, 咩野係唔得, 但淨係知呢個靈芝龜齡膏係可以接受, 藥材味有, 不過唔算濃, 而且整得幾滑口, 唔使咬都可以吞得, 可以; 而西瓜柚子西米撈就幾攪笑下 , 西瓜波就淡而無味, 柚子就苦中帶澀, 而西米撈就勁甜, 師傅肯定佢溝甜水, 加上西米冇咬口, 完全唔得, 不過一次過比你試晒咁多種味覺享受, 仲想點? 總括黎講食物質素一般, 環境勁逼, 加上唔夠人手, 服務普通, 價錢就一般, 勉強可以去食; 師傅明明話去食甜品, 竟然變左食補品; 但係間甜品店竟然係補品出色, 問你服未? 下次喺銅鑼灣區最好都係唔好搵甜品食上策, 笑臉肯定冇可能比, 好在又喊唔出, 師傅咁嘅心情都冇事, 你都算大話夾好彩喇!