添記糖水 (已搬遷) 新店位置

紫薯手抓餅紫薯三重奏($25)每次去台灣必食嘅手抓餅而家係香港都周圍有得食啦！但老老豆豆，紫薯嘅又真係未試過，司令今次係天水圍搵到尼間小店，梗係要即刻試試啦！小店原來係一間糖水店，但手抓餅嘅熱潮都幫佢地帶黎唔少人流，老闆娘仲好熱情咁向大家推薦佢地唔同口味、有咸有甜嘅手抓餅添。等左一陣，熱辣辣嘅手抓餅新鮮出爐。紫薯手抓餅鬆軟，而入面嘅紫薯餡料好綿密，並唔係一粒一粒嘅紫薯粒黎架。除此之外，係紫薯入面仲食到有微微嘅薑辣味，好似食緊蕃薯糖水咁。由於司令點嘅係紫薯三重奏，餐牌上雖然標示包有芋圓，但其實入面包嘅係自家製小丸子，食落口感唔錯，但作為甜品黎講就太full啦！所以司令第二次再幫襯就走左小丸子啦，都一樣好食，仲平啲添($17)。估唔到街坊小食店都有咁特別嘅手抓餅，司令推介大家都可以去試試。