蜜密 (已結業)

難得入元朗，當然要試下呢期火紅火熱嘅蜜密啦！為免要排隊，所以今晚决定食左甜品先。位置都幾僻，都揾左一陣先揾到。雖然睇左食評已有心水，但都係睇睇menu先！ 首先上嘅係和蜂抹茶心太軟。果然無錯，以木板上，賣想已經贏哂，亦聞到好香。切開，綠茶漿湧出。 試一口，甜甜地，少左d 綠茶味。第二口，點上旁邊嘅綠茶粉，苦苦地帶有綠茶香。係綠茶控嘅記得要點綠茶粉呀！值得一讚嘅係球綠茶雪糕，真係好圓，而且唔易溶！綠茶味唔係太濃，但配上濃味嘅心太軟，唔會喧賓奪主。另外，雪糕、紅豆、小丸子、cream都不太甜，所以食完都唔會太膩。冧酒提子伯菲又係另一水準之作。賣相又係一貫的吸引。 淺嘗一口，哇，不得了，好濃烈嘅酒味，由喉嚨至鼻腔都充滿酒香，係愛酒嘅朋友必選的。慢慢食，點埋旁邊嘅醬，會更易入口。伯菲做得好有層次，有少少似雪糕加左cream嘅感覺，好滑。而且夾雜左不少提子乾、朱古力脆脆、nuts,口感更豐富。所有甜品都係即叫即整，大家要耐心等候，而且店子細，太約只有十多個位，唔想等就要避開人多嘅時候啦！