菓甜品 (已結業)

都係自己衰，遲左起身，約女朋友都遲到，食乜當然佢話事啦。咁佢又食左飯，想食甜品喎！甜品店在寶勒巷，好易搵到。𥚃面裝修好文青。意大利巴馬火腿沙律$62估唔到有沙律，真係「你有你甜品，我有我午餐」。巴馬火腿唔會好咸，哈蜜瓜幾甜，如果菜再多d就好！宇治抹茶麻糬窩夫伴雲尼拿雪糕 $70呢個甜品我當午餐咁享用。非常之大件同飽肚，好多紅豆。抹茶啫喱唔太有味，不過重點在中間既麻糬，好足料，好有口感，配上雪糕一齊食真係正。鮮果芒芒 $76女朋友叫既，真係有成杯芒果，中間有d忌廉。芒果超甜，芒果雪糕d甜好自然，唔會好甜，個人認為咁樣既味道配撘好掂。絲絲入心 $64其實係心太軟＋雲尼拿雪糕，不過第一次見到咁既food presentation！心太軟會流心，中間有一塊好好食既餅，雪糕側邊有d朱古力曲奇碎。切開心太軟令d朱古力漿一滴一滴咁滴落d雪糕度。好食、好睇、好玩，真心感受到制作人既努力及心意。食完甜品，女朋友好似乜都唔記得。女人係易氹既！