Spoon by Alain Ducasse (已結業)

Item: Spoon by Alain Ducasse
Rating: 4
Author: 奧志雷

158 食評

味道

環境

服務

衛生

抵食

2563

尖沙咀

$801以上

法國菜 Fine Dining 酒店餐廳

108

奧志雷

等級4

2.1K

難得凱彤有時陪我過生日，搵間高級法國餐廳浪漫一下先。上綱左揀右揀，由菜色、服務到理境都細心看一遍。好，就試 Spoon 啦。相約 K11 見面，就雙雙途步前往洲際酒店。Book 左七點鐘 table，侍應姐姐帶我地步入餐廳。華麗既裝潢，十分寧靜既環境，暗淡既燈光營造浪漫既氣氛，無敵大海境盡收眼底 ﹗

姐姐帶我地到預先安排好既位置，就交由另一位侍應哥哥接待。一輪簡單介紹及查詢有否對任何食物敏感後，我地 order 支有汽礦泉水再望下 menu 有咩好野食先。我已經有最後決定喇，似乎 order dinner set for 2 較為實際，可以用比較經濟既價錢試多幾款美食與甜品，因為第 1 次黎都未有咩特別既 idea，如果 order 錯野就慘喇，免得浪費左個 quota 同金錢啦。環顧四周，閒日黎講食客都算少喇，現在只有三四枱，大多數以一對對男女為主。

餐前小點 3 款，侍應哥哥以廣東話加上英語詳細介紹食物既材料與製作，非常專業，遺憾地我英語程度低未能完全明白，不過都十分感謝。無花果曲奇，味道好夾，面頭清香多汁無花果撞上脆口略甜既曲奇，完美既配搭。芝士夾餅，用 3 種唔同既芝士配搭而成，各有各獨特既香氣與質地，幼滑與硬郎於一身，芝士味餘香強烈，不其然發出讚嘆之聲。櫻桃果凍，上面係新鮮櫻桃蓋著下面一小片櫻桃果凍，入口清新，酸甜味皆有，可為將會來臨既第 1 道菜作預備。

餐前小吃，肉桂餡餅，泛著清淡肉桂味道，外脆內軟，我一向都對依類炸物麻麻，不過幾好食噃。海鹽旋風飽，酥皮薄薄勁鬆化，食落脆到沙沙聲，好鬼 high。麵包濃厚既牛油味環繞整個空間，外層脆卜卜，裡面軟塾非常。麵包味香濃新鮮，加上海鹽手做牛油，絕！控制住自己唔可以再添食呀，如果食麵包食飽左點算好，連頭盤都未開始呢。Rosie，無酒精既 mocktail。新鮮士多啤梨蓉調製，似果汁。

忌廉青豆蓉，作為開胃菜真係唔錯，聽侍應哥哥介紹係唔知咩青豆蓉咩忌廉檸檬葉混合囉，哈哈。忌廉幼滑厚身，散發出青豆及檸檬葉香味，非常醒神。紅桑子忌廉羊奶芝士湯，今次換來位洋妞姐姐全英語介紹菜色，咩紅桑子咩忌廉，真係唔好意思，我已盡力聽架喇，thank you very much。總之好好味啦！羊奶芝士應該係淡軟芝士類，因為味道不嗆不霸道，溫和而帶著清香。

芝士洋蔥雞汁貝殼粉，好可愛呀 ﹗第一次見咁細粒既貝殼粉呢，而且係找第一碟讚既貝殼意粉，堅堅堅好味，要拍手歡呼！貝殼著得彈彈的，非常有彈性，令我聯想到廣告中經常提到既要幾彈有幾彈呢。而且佢地憑著天生驕人既兜形身材，每一粒都滿載芝士雞汁濕潤地集體跳入口中。洋蔥甜美、雞汁清爽、芝士咸香，打得火熱，美味 ﹗

Basil cooler，薄荷味跟 Basil 比例均勻，同樣突出。其實我感冒中，鼻塞好辛苦，諗住叫杯薄荷味可以通一通，但完全無效呢，仲更加辛苦。係喎，感冒要飲暖或熱飲品呢，可以舒緩氣管，忘記了。第 1 輪排山倒海既攻勢可以稍作休息喇，係我地歇歇之餘，可以享受下現時寧靜同浪漫既氣氛，而且恰巧幻彩慶香江開始，欣賞下激光表演幫助消化都好。

甜椒南瓜花龍蝦汁松子仁燴藍龍蝦，萬眾期待既第 1 道名貴主菜終於都現身喇 ﹗現時侍應哥哥跟洋妞姐姐會不時交替招乎及介紹佳餚呢。藍龍蝦居然係令人意想不到既新鮮度，好肯定唔係雪藏貨。海水味濃郁，入口爽彈有嚼勁，龍蝦既鮮甜味失控地係口腔度橫衝直撞，超級美味 ﹗各具特色既配菜混得非常出色，清新既感覺非筆墨能夠形容，南瓜花獨特既幽香清甜使我完全唔知道如何演繹，總之非試不可 ﹗再加上甜椒爽甜、松子仁脆口，多角度多層面既攻擊，我只可以投降罷了 ﹗

鴨肝併牛柳配黑松露牛肉汁，黎個 standard dish 試試先，我都非常喜歡食牛架，洲際既 Steak House 牛扒非常出名，但唔知道洲際既 Spoon 又如何呢？鴨肝併牛柳配黑松露牛肉汁，牛扒一向食 rare 3 成熟，外面要煎得熱騰騰夠香口，裡面要微暖鮮紅色，咁就最靚喇。rare 3 成熟完全半點都難唔到大廚既手藝，非常滿意。鮮嫩紅肉滑滑的，散發淡淡牛肉味道，肉汁像泛濫般不停湧出 ﹗外層香口 juicy，牛味比生牛肉更濃厚更深沉，每一口肉汁激射。佔上少許黑松露牛肉汁，牛味更發揮得淋漓盡致，無得彈 ﹗有趣地廚師諗到將鴨肝配上脹卜卜又非常薄既空心麵包，可去油膩感，有創意又特別。鴨肝當然不及鵝肝肥美油潤，沒有大量油脂，所以食落會較乾及硬身。味道組合好滿意，酸酸甜甜加點麵包味，亦泛著鴨肝油香。

頭盤歇一歇，依家完左主菜再歇一歇，就到最後既甜品時間喇。侍應哥哥跟洋妞姐姐收拾好枱面，預備好食甜品既餐具，我地都非常急不及待喇。車厘子果凍，車厘子 jam 墊底，淋上車厘子汁，鋪上金箔，全部都係熟透既車厘子，只有甜味無酸味，好食。車厘子雪芭，車厘子味道清淡，食落透心涼。朱古力棒子醬脆條，超正呀﹗朱古力味道非常濃郁，有軟有硬又有脆，仲有金箔添，好好味呢 ﹗

自家手做棉花糖，絕無任何添加或防腐劑，兩款捲係透明玻璃餅中儲存，好似蛇餅一樣，哈哈。洋妞姐姐成條取出再每款剪出兩小塊放係我地面上，入口棉滑，而且爆炸一般迅速溶化，好鬼得意，微甜清爽不濁，真係食得出的新鮮味道。法國人真的非常注重每餐作為 ending 既甜品呢，未試過會咁多款式，林林總總、包羅萬有，我地已經好飽喇，食唔晒喇。個外賣盒好靚喎，打包左好多朱古力返去呢。多謝凱彤親手畫既生日咭，thank you。