影片
更多
2018-09-11
482 瀏覽
早前男友生日，每年都會去同佢食餐好嘅慶祝。繼上年試完法國菜，今年我地挑戰omakase – 廚師發辦。為左隆重其事，今次都上網睇左港九區大量的高級日本菜餐廳，最後揀左間菜式比較獨特，又唔止係食壽司或鐵板的omakase。呢間餐廳位於灣仔，面積唔大，晚市只做omakase廚師發辦，而且我訂枱嘅時候要求坐吧枱，職員同我講話夜晚的omakase只開放吧枱坐，叫我可以放心。當晚有2款omakase套餐可選，分別係$1200套餐 (可品嘗15種菜式加卷物) 及$1500套餐 (可品嘗18種菜式加卷物)，我見$1200 已有咁多野食就揀左前者試試。我地一去到坐左陣，睇住師傅同個助手好用心咁準備黎緊嘅菜式。前菜有3款，上碟擺盤好精緻，充滿日本風情，serve 嘅女仔話要先食粟米、腐皮再食個螺。前面白色嘅粟米來自北海道，師傳話叫做「未來粟米」。本身睇個樣好似「乾爭爭」，點知一咬落去好多汁又好爽甜，完全同個樣係兩回事！跟住嘅日本腐皮都好有驚喜，豆味好香濃，而且好滑溜！個螺唔記得左係咩螺，都好彈牙鮮甜。食完道前菜令我好期待黎緊嘅菜式！「好大隻蠔啊」，我真心尖叫左出聲，雖然唔係無食過咁大隻，但估唔到omak
早前男友生日，每年都會去同佢食餐好嘅慶祝。繼上年試完法國菜，今年我地挑戰omakase – 廚師發辦。
為左隆重其事，今次都上網睇左港九區大量的高級日本菜餐廳，最後揀左間菜式比較獨特，又唔止係食壽司或鐵板的omakase。
呢間餐廳位於灣仔，面積唔大，晚市只做omakase廚師發辦，而且我訂枱嘅時候要求坐吧枱，職員同我講話夜晚的omakase只開放吧枱坐，叫我可以放心。
當晚有2款omakase套餐可選，分別係$1200套餐 (可品嘗15種菜式加卷物) 及$1500套餐 (可品嘗18種菜式加卷物)，我見$1200 已有咁多野食就揀左前者試試。
我地一去到坐左陣，睇住師傅同個助手好用心咁準備黎緊嘅菜式。前菜有3款，上碟擺盤好精緻，充滿日本風情，serve 嘅女仔話要先食粟米、腐皮再食個螺。
前面白色嘅粟米來自北海道，師傳話叫做「未來粟米」。本身睇個樣好似「乾爭爭」，點知一咬落去好多汁又好爽甜，完全同個樣係兩回事！跟住嘅日本腐皮都好有驚喜，豆味好香濃，而且好滑溜！個螺唔記得左係咩螺，都好彈牙鮮甜。食完道前菜令我好期待黎緊嘅菜式！
「好大隻蠔啊」，我真心尖叫左出聲，雖然唔係無食過咁大隻，但估唔到omakase有得食質素咁高嘅肥美北海道真蠔！
真係好似我隻手掌咁大！師傳預先加左少少醬油同紫菜調味，令真蠔嘅味道更加昇華！真係打打下都好想食！
跟住落黎就係各種日本空運嘅鮮甜刺身！忘了提，芥末也是未開始食之前見師傅叫助手新鮮即磨的！帶子刺身同赤貝刺身好爽甜，唔會淋，我是沒有點芥末蓉食的。
深海池魚很是肥美，師傅連上碟造型也是一絲不苟的。
跟住落黎嘅白蝦刺身配鏗魚內臟真係好香好好味，大推！
師傅表示日本白蝦係全世界最細嘅蝦，唔好睇碗仔細細，入面有20-30隻日本白蝦，食之前先將日本白蝦及鏗魚內臟撈勻。白蝦超鮮甜，肉質嫩滑，配埋鏗魚內臟嘅甘香，一道令人不能忘懷嘅菜式！師傅仲話呢道菜式係香港無咩地方可以食得到！
跟住小休一陣，師傅安排左自家醃製嘅牛蒡俾我地試下，清清味蕾之餘又可以慢慢睇師傅準備黎緊嘅菜式。
呢道汁煮鮑魚，我相信係燉煮左好耐，鮑魚、香菇同大根都好入味，不過我覺得味道濃左少少。
另一驚喜好味之作係呢個紫菜包住嘅燒帶子配海膽！個帶子超大隻同厚身，師傅用火槍輕輕燒一燒表面，再夾入大量海膽，一口咬落去好香，而且海膽味好出，唔會被燒香嘅帶子搶左風頭，絕對係必食之一。
小妹去日本菜餐廳最中意就係食茶碗蒸，因為好中意食個滑溜嘅蒸蛋。呢度嘅海膽三文魚子茶碗蒸可以話係我食過最好味嘅茶碗蒸，而且出外日本餐廳都好少見呢個配搭。三文魚子咬落爆晒啲汁出黎，少少咸咸地配上清清地嘅滑蛋，兩者味道都提升晒！再加上鮮甜海膽，不用我再形容都知好香甜啦！
之後就到壽司啦！除左採用時令嘅食材例如肥美嘅秋刀魚之外，配料的搭配同做法都充滿驚喜，等我同大家分享幾款令人回味嘅壽司。
首推的是呢款唔似海膽壽司嘅壽司。師傅表示，出面食到嘅海膽壽司都係直接將海膽放係壽司飯上面，不過他卻是先將海膽處理，更謂此做法全港只有2間。真開心可以試到咁獨特嘅海膽壽司！雖然個樣唔討好，不過一食就會驚嘆海膽嘅鮮甜味同壽司飯結合得好出色！齒頰留香，味道久久未散。
另一款係下面嘅喜之次魚壽司配黃芥子。喜之次魚燒得剛好，充滿油脂香味，配上微辣嘅嘅黃芥子，味道層次豐富！
鯖魚西京燒就食得多，鯖魚刺身壽司真係少食。呢款鯖魚壽司肉質鮮嫩，配上芝麻，更添香氣。
時令嘅秋刀魚壽司好鮮甜！
師傳特登係上碟前大力拍一拍北海道石垣貝，令佢挺身，仲好貼心咁問我地係拍片定影相添！
咸香嘅筋子壽司
入口即溶嘅中拖羅壽司
即完壽司就黎一碗鏗魚湯暖暖身，並準備好迎接黎緊嘅飯同甜品。湯入面有鏗魚片、紫菜、同豆卜(好似係)，用料十足，好清甜。
接著嘅碎吞拿魚手卷亦係難忘之作。師傅首先將吞拿魚切碎，然後用火槍燒魚片，將燒魚所得嘅油脂滴落吞拿魚粒之中(魚片並非用黎食，只係想要佢啲油脂)，再拌入其他配料，味道好豐富甘香！
最後以一道綠茶奶凍配紅豆作結。不過，估唔到師傅連甜品都自己製作！綠茶奶凍綠茶味突出，紅豆微甜，唔會搶左綠茶奶凍嘅味道。
由7點食到10點半，咁就過左完美嘅一個晚上。
張貼
