小老板 (太安樓)

營業中

休息中

呢幾日天氣熱辣辣，冇咩胃口食正餐，經過小老板，剛剛生煎包同鍋貼出爐，香噴噴，忍唔住買返去做lunch。$80就足夠2-3人份量，好抵食又好味。生煎包 $12/3隻嚟到小老板點可以唔買生煎包呢？呢度嘅生煎包，每一個包底都煎得好靚，金黃香脆，包面就灑咗d蔥花同芝麻，非常吸引。外賣盒每隻角度拮了窿透氣，拎到返屋企一咬開，個包鬆軟，個包底仍然好香脆，內裏有肉汁流出，肉香非常。煎鍋貼 $12/3隻每隻手工餃子都包得好靚，啲摺好整齊，餃子皮薄，鮮肉餡料多，煎得焦香，沾上提供嘅鎮江醋，好開胃又香口。蔥油餅 $8/1塊每日1pm先開始有得賣，新鮮手工製，蔥油餅好香酥，熱辣辣，鍾意佢有好多香蔥，再加上芝麻，鹹香美味。菜肉小雲吞 $20/8隻雲吞皮好薄，滑嘟嘟，菜肉餡料比例平均，簡單配以豉油湯底加上香蔥，清淡得來健康又好味。魚蛋及燒賣 $8/5粒除咗上海點心之外，呢度仲有港式風味嘅小食，魚蛋同燒賣有得揀辣或者唔辣，我揀咗辣，除咗豉油汁之外，還有一包秘製嘅辣醬，好滋味。