劉興記生煎包專門店

營業中

休息中

劉興記新開時好多Foodie出post介紹，嗰陣排長龍，等候一陣大約15至20分鐘先有得食，最近去食第二次唔知係咁啱定係熱潮已過，已經唔使點排。餐廳主打生煎包上海菜，生煎包非常出色，但其他就一般般，不過勝在算抵，喺旺角區嚟講算係比較平嘅餐廳，而且味道整體嚟講都OK。普通生煎包同蟹粉生煎包都非常之Juicy爆汁，皮薄，個底非常之脆，應該好多人keep住叫，都係新鮮整起非常之熱，叫咗要等一陣先上菜 ，熱到等一陣先食得落。蟹粉小籠包雖然貴啲，但都真係好有蟹味，值得一食。上海排骨菜飯同雞絲粉皮味道都唔錯，不過真係冇乜特別，冇評語可以比到，正常食物。酸辣湯就唔得啦，酸到揦埋口面，除咗醋味其他咩味都食唔到，唔係好知食緊乜。豆漿正常少少甜。不過呢間嘢真係小籠包出色，其他普通正常，建議叫多啲小籠包食，其他飯就叫一個兩份share夠。