滿粥順德粥底海鮮火鍋

營業中

休息中

開始轉季就好想打邊爐，知道屋企附近開咗間新開嘅粥底火鍋，見價錢都幾吸引，今晚就同老公去食我哋兩個揀咗肉蟹套餐，每位$198連加一，佢套餐包7款時令海鮮，再可以揀六款火鍋配料。海鮮種類豐富，有兩款蜆，食落完全無沙，好清甜，另外有蟶子，基圍蝦，肉蟹，鮑魚，同魚片。蟹同蝦送上嚟嘅時候仲見到好新鮮有郁動，抵讚。另外都好欣賞餐廳有寫低每款海鮮要煮幾耐，記得蟹蓋可以最煮粥先落，雖然我早落咗，煮完肉蟹之後聞到超香。六款火鍋配料我哋揀咗魚腐春卷，響鈴，墨魚丸，肥牛，娃娃菜，同手工豆腐。個人喜歡魚腐春卷同手工豆腐，好好食，打邊爐必嗌。怕太熱氣我哋另外嗌咗一樽雪梨海底椰，比想像中驚喜，好清甜，值得一叫。去到煮粥嘅時候，入面已經有粟米芋頭番薯煮到淋晒，仲有咁多款海鮮嘅精華，之後會再加粥同其他配料，都好似芫荽同菜脯，仲有落雞蛋添，依碗綿綿嘅海鮮粥真係一試難忘。