磯野水產

營業中

休息中

見佢午市一人餐九折，咪試下囉，啲海鮮又真係幾得喎，而且個餐好多嘢食、好多款式，未食到最後已經飽到有啲食唔落。坦白講，食個lunch $300起跳真心肉赤，但食完之後又覺得好合理，話晒又魚生、又蠔、又虎蝦、又鮑魚、又和牛鍋，真係一分錢 一分貨。望望個海鮮拼盤，款款都大大件，個鮑魚仲識郁㗎，所有海鮮，師傅當住你面即場燒畀你食，夠晒儀式感之餘，蟶子、貴妃蚌等等仲要勁鮮甜，醬汁都唔使落。連啲沙律都hea你，唔係蟹肉就食魚生，清晒，一啲都無食剩。海鮮蒸蛋相對淡味好多，但就好滑，之後再食鹽燒牛小排、燒羊架呢啲重口味，口腔嘅感覺就相當平衡，一淡一濃各有特長。嚟到呢到其實已經飽晒，再上個和牛野菜鍋同海膽吞拿魚腩蓉丼，真係望到都飽。諗係咁諗，但一食落口，就停唔到，又係清晒。和牛唔使講啦，高質嘢好難食剩，連個丼飯都因為海膽加吞拿魚腩加持之下，一口一口好快就無晒。Ok，一個lunch可以飽足全日，晚餐都唔使食，啱晒168食法人士。