Wooden House (已結業)

適逢世界盃放假，契妹話要慶祝七四美國獨立紀念日，出名為食o既小肥契哥亦懶理自己夜啲要參加舞會，收咗工就先同佢去天后一家聽講有十蚊生蠔食o既「Wooden House」度輕食晚膳。隱藏於後街o既西餐廳樓底極高，餐桌全用上合併式木造枱櫈，整潔衛生。入座後，溫婉o既妹妹隨即送上溫水及餐牌，桌上亦餐具齊備。晚市散叫餐牌共有七頁之多。酒牌則只有一頁。當問及妹妹係咪冇啤酒飲時，佢就解釋話店子剛剛開始有兩款生啤飲，週一至四全天仲做緊買二送一優惠，只係新到未黎得切印落酒牌而已。聽見兩口子想開枝汽酒賀七四時，妹妹仔就提議我地一試店子新入$250/樽o既西班牙汽酒。「Cheers!」Coffin Bay生蠔（$38/隻）：二人原意係黎食十蚊生蠔，無奈落單時十蚊嗰款早已賣清，最終唯有應推介每人要咗兩隻澳洲「Coffin Bay」生蠔。兩雙生蠔以拼盤呈上，蠔隻新鮮嫩滑，並滲透著香濃o既海水味。大啡菇，蒜頭，香草，溫泉蛋（$78）：大大隻啡菇以沙律菜墊底，菇面隻溫泉蛋白裡透鮮黃，賣相已值滿分。大啡菇本身厚潤芬芳，混入橙黃流心o既靚靚溫泉蛋，食落更是香滑無比，甜美可口！窩夫配意大利雪糕（$58）：主菜窩夫厚身得黎