樺得園 (已結業)

生酮左整整一星期，實在係煮到厭。腩夫話去九龍城試吓生酮漢堡。我兩眼即刻發光，佢又可以食下正常嘢😂雖然係星期日，但都係等咗5分鐘就有位啦。我叫咗個飛驒牛肉生酮漢堡（走醬），加咗個風味雞翼，當然比腩夫食啦，仲有凍檸茶走甜。另外嗌咗黯然銷魂漢堡，加咗紐倫堡腸。另外仲見到有生酮夾餅，本着不妨一試嘅心態嗌咗。首先嚟咗飲品同埋生酮夾餅，店員會問你需唔需要羅漢果糖花生醬。我有諗住不如又試吓啦😁😁😁夾餅外貌好似格仔餅，仲放咗舊牛油喺上面。加埋羅漢果糖花生醬一齊食，你咁多日冇食過澱粉質同甜野之下，佢變得好好食。腩夫試咗一啖，話留返俾我食。但係見到我食淨啲花生醬，唔知係佢肚餓定係覺得啲花生醬好食，其他食物未嚟嘅時候，佢就係咁撩啲花生醬嚟食😂😂😂飛驒牛肉漢堡好快就嚟到，但係外型好迷你🤣。雖然我係走醬，但係都好juicy。唔係食過好多生酮餐廳，所以形容詞都比較貧乏啲，整體黎講都幾好食。食緊漢堡期間，風味雞翼同埋紐倫堡腸都嚟咗。黯然銷魂漢堡真係等咗一段時間，嚟到嘅時候佢係菠蘿包做包皮叉燒係勁熱辣辣。但係佢嚟到嘅時候我已經食晒我自己嘅嘢，所以不斷係咁問腩夫好唔好食😂🤣，佢話非常值得一試，感覺好新穎。