萬歲

營業中

休息中

今日首次試呢間小店，無叫太多特別菜式、就咁一碗出前一丁、凍奶茶同一碟鮮竹卷。基本上食物質素都合格有餘、奶茶夠滑，麵底煮得剛剛好、$40完全係合理而且同同區比係滿意嘅水平。而呢一編食評嘅重點係後加嘅鮮竹卷。先講下價格先、一碟3件$30，相對隻麵嚟講算小貴，但係一食就明佢唔係亂標價。先講賣相、兩面煎到少少啡色、加上即叫即煎，整體外表係吸引嘅。夾落去軟身、本身以為會穿底而令我失望之際，夾起無散到(除咗有一條我唔確定係我落筷子嗰下整穿定點)，睇到啲鮮竹好似個袋仔咁袋住啲餡、嗰下就知有啲料到。咬落去有汁出，而且鮮竹都剛剛好、面個層香口、入面個層滑口、加埋餡料調味唔搶，呢個鮮竹卷幫我嘅下午茶加咗好多分。最後講下其他食客話嘅態度方面，個人認為無問題 、老闆娘言談之間都透露出佢同自己食物品質嘅信心，對我嚟講係吸引我回頭幫襯嘅其中一個原素。