飯後甜品 (已結業)

同男朋友喺屋企食飽飯就落街行下搵下甜品食。行到大埔墟見到依間〈飯後甜品〉，發現都好一陣子冇食過港式甜品糖水，一於試試佢～小店環境好溫馨，周圍放咗好多公仔，仲有一面貼滿客人大合照同家庭照嘅牆，好有屋企嘅感覺。menu入面港式特色甜品、傳統中式糖水、芒果、奶凍系列，諗到嘅都有。店員見我揀唔到就推介我食新出嘅雜果芋圓仙草撈，menu上仲未有架！雜果有哈密瓜、火龍果、西瓜、罐頭黃桃，同三色芋圓仲有滑嫩嘅鮮草撈埋一齊好豐富。面頭加咗啲柚子肉，酸酸甜甜好好味最後汁都飲埋。問過店員芋圓都係自家製嘅，睇顏色分別有芋頭、紫薯同黃心蕃薯，食落好煙韌冇渣，果然推介得係唔錯呢！另外仲嗌咗碗薑汁花生湯圓－薑汁飲落辣辣地，好啱我口味；花生餡好香，湯圓比平時食開嘅細粒啲，依個份量就啱啱好。食過用心製作嘅飯後甜品真係好滿足呢～