金記冰室 (已結業)

又黎到厚和街呢條又叫西環食街嘅揾食大街啦，差唔多每日都會見到金記冰室喺度，但係無一次行入去嘅，平時都係大排長龍，今日見出面人流冇乜，就同啲同事入去試吓啦。佢哋主打懷舊風，一入去已經見到地下有個好有心機用磚砌岀黎嘅招牌。上網一搵先知原來呢一間係老牌茶餐廳，近排新裝修又係其他地區插旗。我哋等左5分鐘就有位坐啦，見到其他位啲人都食緊個雞脾餐咁就嗌一個啦。有炸雞髀+沙律再配一個意粉或者公仔麵，雞脾炸得好香又唔會太乾而且份量都好多，一個女仔一定夠口又或者可能食唔晒添。我同事就帶嗌左個西多士($26)，一上菜已經好吸引好邪惡呀!! 鍾情食常餐嘅我就嗌左個鮑你好味($36)，火腿奄列配多士再加鮑魚火腿通粉，最正宗的常餐，唔會難食得去邊!當然，佢嘅湯底都唔馬夫啦! 鍾意啲懷舊餐廳有谷咕，無糖嘅熱朱古力，飲飲下就發覺，杯邊有古怪喎!!!'多謝你飲我'，令人會心微笑。香港人都要多謝你，咁用心咁將香港茶餐廳文化傳承落去。