佳佳甜品

營業中

休息中

老老實實，一向唔明點解啲港式糖水店成日都頹整，一大半店舖都係整溝粉溝水糖水，又加埋啲古怪生果，亂咁配搭，好多都食過一次就怕怕。拎過米芝蓮嘅佳佳甜品，最欣賞係佢真係用心整，雖然口味嘅野好個人，但一定睇得出佢有誠意，唔係買現成椰漿溝水頹整，真係買足材料自己磨自己煲，而且價錢都係平民價，就知道出面啲濫竽充數糖水店食水有幾深。例牌叫我最鐘意嘅芋茸西米露加湯丸，啖啖芋茸超足料，不過唔知係我口味轉咗定點，無論糖水定湯丸都比之前甜，食完好濟，希望可以改善下。整得一讚嘅係，佳佳甜品無論疫情前後，一樣坐得咁舒服，唔係一般糖水舖同隔離位膊貼膊嗰種，裝修又骨子，食完飯同朋友嘆返個糖水下場就最perfect。