養生糊甜品專門店 (已結業)

之前睇過介紹話依間傳統中式糖水舖以前喺北角書局街開店，由店主兩夫婦一手一腳打理，不過因為雙手勞損而結業。而家喺炮台山重新開業，作為街坊當然要幫襯下啦！舖頭門面同出面都放咗有附圖嘅menu，清晰易睇，價錢相宜，更加有介紹每款糖水嘅食材功效，可以揀番碗啱自己嘅中式糖水。小店雖細但都有提供座位可以即場食。依排芋頭當造就嗌咗碗香芋椰汁西米露－老闆有問要唔要加奶，不過想試真啲個椰汁香就冇加到。芋頭軟綿好香，西米煮到透身，甜度適中，食完都幾飽肚。之後買咗碗芝麻糊同蛋白杏仁露返去同屋企人分享。芝麻糊係小店嘅招牌，到而家都堅持人手炒香用石磨生磨，絕對唔用粉開。芝麻糊香濃滑溜，低糖份夠健康，有黑髮、通便、潤膚嘅功效。好多人會怕杏仁陣味，但我就好鍾意（可能因為由細聽媽媽講飲杏仁茶對皮膚好）。蛋白杏仁露真材實料，味道好香而且入口順滑，滑捋捋嘅蛋白融入咗喺杏仁露入面，每啖都好滋味，食完真係有潤肺養顏嘅感覺。到而家仲有咁用心專心製作中式糖水嘅舖頭真係好難得，希望有更多人認識到依間小店支持下！