TC Bistro (已結業)

又到拍拖時間啦，呢間餐廳之前參加朋友結婚晚宴時發現的，相隔差不多半年才來這裡。餐廳位置在商場附近，位置方便容易找到。這餐廳主要是吃牛肉的，碟子上也印上牛的圖案。餐廳格調前衛帶點高雅。是日沙律，煙三文魚沙律，沙律菜和火箭菜好新鮮，食嘅時候係好似食薯片嘅脆卜卜聲咁，車厘茄好甜好多汁，配左少少醋去調味，好正。是日餐湯，南瓜忌廉湯，南瓜打得好溶，無渣，湯味濃郁幼滑，加上烘烤過嘅麵包，好食到停唔到口。北海道帶子香草醬意大利飯帶子兩邊煎過，香脆，肉質鮮嫩。意大利飯唔會太硬剛剛好，配上香草醬感覺清新而且唔會膩，有驚喜。威靈頓牛柳（一人份量）見到多人好評，但無預訂，膽粗粗問下仲可唔可以order，好彩有得食，其實我係第一次食威靈頓牛柳。份量大，如果我自己食一定食唔曬，酥皮焗到金黃色，切開後，牛柳厚身肉質嫩滑多汁，焗到剛剛熟，同酥皮一齊食口感更豐富。我自己鐘意夾埋旁邊嘅蒜粒一齊食，好好食。最後叫咗杯熱檸茶，茶香味甘，大愛。老公話下次再嚟試其他菜式，我已經諗好要試啲咩啦，哈哈。