財記海鮮火鍋活魚刺身

營業中

休息中

大角咀埃華街出名美食多， 之前嘅母親節， 就同咗屋企人一齊去打個邊爐， 出去食番餐好嘅，唔使老媽子煮飯咁辛苦。呢間《財記海鮮火鍋》門面相當之吸引，門外嘅魚缸放滿咗生猛嘅海鮮，主打活海鮮刺身。今晚我哋就叫咗個清清地而又健康嘅【蟲草花冬瓜雞鍋】， 啱曬 炎炎嘅夏日， 解暑又解熱。 呢個冬瓜雞鍋用料十足，厚切嘅冬瓜原個放入鍋內， 上面就放咗半隻雞， 當湯滾起之後， 冬瓜就慢慢煮到淋身， 而且易吸收咗雞汁嘅精華美味。 蟲草花有益健康， 令湯更加之清甜。當湯滾起之後可以先食雞， 咁就可以食到最嫩滑嘅雞肉啦。重頭戲牛肉就嗌咗【本地手切肥牛】同【本地金錢展】， 兩者都各有特色。 本地手切肥牛肉質嫩滑， 色澤紅潤，唔會有筋。個人覺得本地金錢展比本地手切肥牛牛味更加濃郁， 肉質較為爽口， 而且切得較薄， 輕輕滾一滾就食得。另外呢個【中山脆鯇骨腩】亦同樣值得推介， 脆鯇骨腩唔算多骨， 而且連皮嘅位置更係非常之爽口，咬落索索聲。打邊爐又點少得吸湯嘅【台式凍豆腐】呢？ 冰豆腐健康又索湯， 將湯汁嘅精華吸收， 而且又高蛋白質， 夠曬營養。另外亦都有我至愛嘅【即炸響鈴】， 響鈴即叫即炸，炸得金黃香脆， 豆味香濃。